| Яўген Гучок | |
|
Чужыя словы мне не трэба: Хапае ўласных сэнсаў мне, Што йдуць з падвышанага У маёй роднай старане.
* * * На гэтай мове уркі не гавораць, На гэтай мове "Мурку" не пяюць, На ёй баявікоў не падбухторваюць, Каманды тэрарыстам не даюць. Таму яна ў няміласці ў падонкаў, Яна для іх - бы дзірка у страсе; Таму цераз Сусвет па лёдзе тонкім Яна сябе да Сонца данясе.
* * * Да мовы трэба дарасці, А перш - разумным нарадзіцца, Прынамсі, тут ў Беларусі, Дзе дзяцюкі і маладзіцы, Ды і старэча і малеча Сядзяць ў духоўным у запеччы.
* * * Чаму беларуская большасць Мову не можа сваю любіць? Таму што яна ж - гэта большасць Не жадае у вечнасці жыць.
* * * Ад мовы мы, нібы ад Бога, Паадмаўляліся - і вось З нас пруць і лезуць шмат і многа І губашлёпства і дурносць.
* * * Матчына мова! - Пустое то слова... Глянь, як амаль усе маткі Збеглі ад роднай мовы, Збеглі, здрадай падмазаўшы пяткі.
* * * Суседу кажу: "Душа мне баліць, Калі нашу мову бэсцяць"; А ён у адказ: "Цябе трэба лячыць У Навінках ды іншых падобных месцах".
* * * Беларус пра прыгажосць Роднай мовы мовіць, Шавініст ужо нажом Яго ткнуць гатовы. |
Яшчэ і той у Беларусі Найплённа мову вынішчаў, Хто ў кар'ерысцкай у спакусе На ёй пра Леніна вяшчаў.
* * * Ні адное людской мовы Ён не вывучаў, аднак Цвёрда і навек засвоіў Знакі гадаў і сабак.
* * * - Наўкола гавораць пра што? - Ды ні пра што! - Чаму так? Мо змова? - Бо роднай зракліся мовы!
* * * Да вёскі ты не апеліруй, Калі за мову йдзеш на бой, Бо вёску шчырую у вырай Сагнаў калгасны сухастой.
* * * Ахрышчоны ў праваслаўі, Паспяшаюся ў мячэць, Калі моваю Прадславы Будзе там мула гучэць.
* * * Жыць ў Амерыцы? Ні пры якой умове! Спачатку хай Масква Там увядзе сваё двухмоўе.
* * * Візітная картка ў дарогу - Родная наша мова; Пойдзем мы з ёй да Бога, Прыйдзем - з адной умовай - Калі пры жыцці карысталіся ёю Ці згадалі хаця б надмагільнай плітою.
* * * Наўкол у святле каб жылі, Каб цёпла было ў студзень, З глыбінных нетраў зямлі Здабываюць паліва людзі. Вось так, трэба думаць, у глыб вякоў, Каб выжыць, каб апраўдацца, Народу нашаму зноў і зноў Па мову трэба будзе вяртацца. |
|
* * * І гэта патрэбная ўмова, Каб свет заставаўся белым - Няхай беларуская мова Сябе пачувае смела! |
|
| Наша слова № 37 2007 г. | |